КОЦУР – У Доме култури у Коцуре вчера отримани сход руководительох виводзацких танєчних секцийох у КУД-ох у наших местох, а на инициятиву коцурского хореографа Миколу Губаша и у орґанизациї домашнього КУД „Жатва”. Схадзка орґанизована пре пораду о злєпшаню квалитету танєчних точкох на Фестивалє „Коцурска жатва”, як и о репертоаре на тогорочней „Жатви”, хтора будзе 15. и 16. юлия.
Окрем домашнїх Коцурцох, на сходзе присуствовали руководителє фолклорних секцийох у рускокерестурским Доме култури, у КУД „Тарас Шевченко” з Дюрдьова, КПД „Петро Кузмяк” з Нового Орахова, Руским културним центре з Нового Саду и у КУД „Дюра Киш” зоз Шиду. З представителями КУД-ох хтори нє були на сходзе, будзе ше бешедовац о їх точкох на Фестивалє.
На схадзки бешедоване и о стану у КУД-ох у нашей заєднїци, та визначени и велї проблеми з хторима ше кажди хореоґраф зочує. Як єдни з найвекших визначени нєдостаток младих моцох – членох танєчних секцийох, кадрох за роботу, та нєдостаток финансийох.
Шицки присутни констатовали же добре же таки сход орґанизовани, бо було потребне побешедовац о тим цо мож злєпшац у наших ансамблох у хореоґрафиї, облєчиве, алє и у технїчним смислу.
Попри хореоґрафох, на схадзки присуствовали и предсидателька Одбору за културу Националного совиту (НС) Руснацох Ґабриєла Саянкович (и сама хореоґрафка) и предсидатель Вивершного одбору НС Желько Ковач, котри визначели же НС опредзелєл коло 500 000 динари за помоц КУД-ом, хтору Завод за културу войводянских Руснацох витвори прейґ окремних фахових роботньох за виучованє и унапредзованє музично-фолклорней творчосци.
