ШИД – З нагоди 10. децембра, Медзинародного дня людских правох, Здруженє женох „Перши жени Сриму“ зоз Шиду у Ґимназиї „Сава Шуманович“ орґанизовало трибину процив насилства над женми, з назву „Нє сама ши“.
На трибини бешедовали посланїца у Скупштини АП Войводини Стоянка Лакич, директорка Центру за социялну роботу з Нового Саду Добрила Чачия, заменїк командира Полицийней станїци у Шидзе Радослав Лакич и психолоґ у Ґимназиї Йован Комленац.
Бешеднїки визначели же ше кажде насилство муши приявиц полициї и другим державним орґаном и же то длужносц нє лєм фамелиї, алє и гражданох кед дознаю же дахто церпи насилство.
Тиж бешедоване и о пременкох законских предписаньох хтори даваю значнєйшу защиту жертвом насилства, а констатоване и же шицки у державним орґанох – полиция, правосудтво, социялни и здравствени роботнїки муша буц баржей едуковани як поступац у случайох насилства, з окремним акцентом на превентивни мири.
Литературни и поетски твори з тему насилства над женми пречитали госцински, школярки Техничней школи „Никола Тесла“ зоз Шиду.