ШИД – Вчера отримана шеста схадзка Скупштини општини (СО) Шид на хторей одборнїки прилапели вименки дїлованя ЯП за квартельни услуги у будовательну жем и звит о роботи ПУ „Єлица Станивукович-Шиля“ за прешли, та план роботи тей установи за чечуци рок.
СО вименєла и Одлуку о одредзованю зонох и найопременших зонох, з хтору вецей нє будзе плаценя локалней порциї на польопривредну жем як будовательну, бо ше сцера же тота жем будовательна, алє є звонка будовательного подруча.
СО знова меновала Славицу Варничич за директорку Народней библиотеки „Симеон Пищевич”, а потвердзела и кадрово пременки у школских одборох Ґиманазиї „Сава Шуманович” и Основней школи „Вук Караджич” у Адашевцох.
До пременкох пришло и на чолє Управного одбору (УО) Дому здравя Шид, хтори тераз будзе водзиц Стоядин Суботич з Куковцох, место дотерашнього предсидателя УО Радивоя Ґаїча з Ямени.
Вименєне и членство Комисиї за родну ровноправносц, та место Дьордя Томича за предсидателя менована Александар Жиґич, а место Биляни Крч нови член Деян Лоґарушич.
Пре ускладзованє зоз законскима предписанями, одборнїки прилапели и вименки у дїлованю ЯП за квартельни услуги и будовательну жем и Заводу за урбанизем, а меновали и нову Комисию за додзельованє општинских припознаньох. За предсидателя Комисиї меновани заменїк предсидателя Општини Зоран Семенович, а за членох Мита Аврамов, Милана Момчилович Свилокос, Боян Бибич и Драґан Ґутич.
