РУСКИ КЕРЕСТУР – Вчера у Велькей сали Дому култури отримана традицийна програма дзецох з рускокекерестурскей дзецинскей заградки, одн. оддзелєня „Цицибан” – 21. „Бамби-фест”, а у рамикох означованя Дня Установи ПУ „Бамби” з Кули.
Наступели дзеци з пейц воспитних ґрупох – од наймладших тророчних з обданїща, по предшколски дзеци, а пририхтали их виховательки Блаженка Мецек, Оленка Русковски, Наташа Настасич, Емилка Костич и Ксения Вучкович, зоз сотруднїцами.
На удатней и симпатичней програми у живописних костимох и веселей сценоґрафиї, дзеци прейґ танцу, драматизациї, та музичней драматизациї и рецитацийох представели часц своєй роботи у тим школским року.
Дзепоєдни з нїх наступели и як члени Музичней секциї и Малей школи анґлийского язика, хтори робя при дзецинскей заградки под руководительством Татяни Фейди и Сандри Надь.
Конферансу водзели школярки ґлумици-аматере Ребека Семан и Яна Настасич, музични сотруднїк програми бул Сашо Палєнкаш, а Дом култури обезпечел салу, хтора и на тот завод була преполна з одушевену публику.