Отримани Биєнале лемковскей/русинскей култури

автор зам; фото;млш
1.1k Опатрене

КРИНЇЦА (ПОЛЬСКА) – У орґанизациї Здруженя Лемкох Польскей, Шветовей ради Русинох/Руснацох/Лемкох (ШР РРЛ) и Месного уряду, у Кринїци, у Польскей 27. и 28. мая отримани Дзевяти Биєнале лемковскей/русинскей култури, на хторим участвовали и представителє членїцох Шветового конґресу Руснацох/Русинох/Лемкох (ШК РРЛ) зоз Сербиї и Горватскей. Под час фестивалу отримана и порядна схадзка ШР.

У програмох Биєналу у Кринїци Руску матку (РМ) Сербиї предствяли єй предсидатель Дюра Папуґа, котри и член ШР, заменїк предсидателя РМ и член Комисиї за културу ШК РРЛ Миломир Шайтош, писателька и подпредсидателька Реґионалного одбору РМ за Срим Саня Тиркайло и член керестурского Месного одбору РМ Славко Пап.

Делеґацию Дружтва Руснацох „Руснак” з Петровцох, з Горватскей, у хторей була и Дзивоцка шпивацка ґрупа, на Биєналє предводзели Наталия Гнатко и Петро Киш, котри на схадзки ШР участвовал як заступнїк подпредсидателя Ради Мию Шайтоша.

После даваня почесци познатому лемковскому уметнїкови Епифанови Дровнякови Никифорови, пияток у Кринїци орґанизована вистава русинских авторох, а на першим концерту наступели домашнї ансамбл „Ластовичка” (хтори нєдавно прияти и до медзинародного здруженя фолклорних ансамблох ЦИОФ), та дзецински ансамбл „Русинчата” з Мадярскей и ансамбл з України.

Пияток на Биєналє з представу „О двох ґенералох” наступел и Театер Александра Духновича з Прешова, а на соботовим концерту участвовали Ансамбл Рускей берзи „Терочка” з Польскей, „Червена ружа” з Румуниї, Дзивоцка шпивацка ґрупа Дружтва „Руснак” з Горватскей и Ансамбл „Удольчанка” зоз Словацкей.

Под час Фестивалу ШР РРЛ одлучела же тогорочну Награду ШР „Василь Турок Гетеш” за културну роботу достанє позната шпивачка Олґа Прокоп з Чанадиєва коло Мукачова у України.

На Литературним вечаре, хтори на фестивалє отримани пияток, свойо твори представели и Саня Тиркайло зоз Шиду и Михаил Рамач з Дюрдьова, спред петровского Дружтва „Руснак”, а всоботу, на сходзе о сучасней русинскей култури, члени РМ представели нови Медзинародни мултижанрови русински фестивал „Русин филм фест”, хтори ма буц отримани 1. и 2. октобра у Шидзе, а будзе пошвецени страданю Русинох у лаґре Телергоф под час Першей шветовей войни.

Як Рутенпрес дознава од Дюру Папуґу, на схадзка ШР РРЛ, медзи иншим, одлучене же з нагоди 25-рочнїци отримованя Шветового конґресу РРЛ у Медзилаборцох, у Словацкей, на будинку Музею сучасней уметносци Ендия Варголи, под час тогорочного Фестивалу култури и спорту (од 24. по 26. юний) будзе открита спомин-плоча.

Понеже ище скорей одлучене же 14. ШК РРЛ будзе отримани у Горватскей, на схадзки Ради винєшене же то будзе у Осиєку, од 7. по 9. юлий 2017. року.

На поволанку городоначалнїка Свиднїку Яна Голодняка, делеґация РМ внєдзелю, 29. мая нащивела и Штварти Русински фестивал у Свиднїку, дзе мала и окремни приєм при Голоднякови. На приєму представителє РМ познатому русинскому фолклористови зоз Словацкей Иванови Чижмарови уручели пригодни дарунок з нагоди 80 рокох його живота.

ПОВЯЗАНИ ТЕКСТИ