ДЮРДЬОВ – Медзинародне швето 8. марец – Дзень женох, вчера, внєдзелю, 8. марца,
преславене и у Културно-уметнїцким дружтве „Тарас Шевченко” у Дюрдьове з традицийним Осмомарцовским концертом.
На концерту участвовали младши члени секцийох з домашнього Дружтва, школяре нїзших класох з валалскей Основней школи, дзеци з Мишаней ґрупи валалскей Дзецинскей заградки и госци, наймладши члени Културно-уметнїцкого дружтва „Яким Ґовля” з Миколшевцох з Горватскей. Шицки учашнїки на концерту танцовали на мелодиї руских шпиванох, шпивали руски шпиванки и рецитовали стихи наших поетох.
По законченю програми Леся Мудри, уметнїцка руководителька з КУД „Яким Ґовля”, у мено свойого Дружтва домашнїм подаровала полну кошарку овоцох же би ше дзеци и учашнїки после програми погосцели. Попри овоцох, после програми на друженю у дюрдьовски Дружтве присутни були понукнути и зоз домашнїма колачами котри за
тоту нагоду, традицийно, пририхтали членїци виводзацкей фолклорней секциї дюрдьовского Дружтва.