НОВИ САД – Медийни роботнїки, нєвладово орґанизациї, политичаре и гражданє котри потримую Радио-телевизию Войводини (РТВ) у борби за єй нєзависносц пондзелок, 23. мая отримали протест процив змени кадрох на РТВ, на хторим вимагали задзекованя цалого Управного одбору покраїнского явного сервису.
– Вимагаме задзекованя Управного одбору и понїщованє шицких одлукох хтори тото цело принєсло. Тоти одлуки виволали габу зменох на РТВ, без обгрунтованя, погубели довириє гражданох до покраїнского явного сервису и загрожели його обєктивне и нєзависне функционованє – гварела на протесту новинарка РТВ Єлена Вукманович.
Инициятива „Потримай РТВ“ од державних орґанох вимага почитованє нєзависносци явних сервисох, а од Скупштини Сербиї най вибере нових членох Реґулаторного цела за електронски медиї (РЕМ), хторе будзе робиц на хасен гражданох, а нє политичних партийох.
Окрем вимогох же би ше руководительство пребачело за обвиньованє новинарох же нє були обєктивни, гражданє позберани коло Инициятиви вимагаю же би до конца тижня у удерним терминє була отримана дебата „О явному сервису на явним сервису“, у хторей би участвовали представителє руководительства, новинаре, редакторе РТВ и фаховци за явни сервис.
Представителька за медиї ОЕБС-у Дуня Миятович за „Данас“ виявела же є застарана пре одлуку же ше прейґ ноци зменєло цали ушорйовацки колеґиюм на РТВ и пре поставянє нових редакторох без явного конкурсу.