ВУКОВАР – Всоботу, 30. януара, у В&С сали у Вуковаре, у орґанизациї КУД „Осиф Костелник” отримани ювилейни, 50. Културни вечар Руснацох Вуковару, популарно волани Руски бал.
Було коло 250 нащивительох з вецей местох дзе жию Руснаци у Горватскей, як и з Войводини, а медзи госцами були и городоначалнїк Вуковару Иван Пенава, амбасадор України у Републики Горватскей (РГ) Олександр Левченко, член Совиту за национални меншини РГ Звонко Костелник, предсидателька Союзу Русинох РГ Дубравка Рашлянин, предсидателька Ради рускей националней меншини Городу Вуковар Лела Дїтко, началнїца Управного оддзелєня за дружтвени дїялносци Городу Вуковар Ана Живанович и началнїца Управного оддзелєня Городу за културу и туризем Марина Секулич, та велї други особи з политичного, дружтвеного и вирского живота.
Главну награду на томболи, бициґлу, освоєла наймладша шпивачка у КУД „Осиф Костелник” Клара Миклош, док у „танцу шерца” победзели Ирена Дюдяр и Мийо Шайтош.
Грал „Микс бенд” з Руского Керестура, а на Културним вечаре Руснацох Вуковару домашнє Дружтво наступело зоз шицкима своїма секциями.
