СУБОТИЦА – У орґанизациї Бунєвскей матки, Фриске Академиї з Голандиї и Бунєвского европского центру з Голандиї, 24. и 25. новембра у Суботици, у просторийох Бунєвскей матки отримани Медзинародни експертски семинар о язикох хторим грожи опасносц од нєставаня и диґитализованю едукативного материялу за образованє националних меншинох, з писаньом проєктох.
Вовторок, 24. новембра, на Семинаре бешедоване о язикох хторим грожи опасносц од нєставаня, дзе реферати винєсли представителє бунєвскей, ромскей, словацкей, чарногорскей, бошняцкей, єгипетскей, а спред рускей меншини на тоту тему викладал проф. др Михайло Фейса. На Семинаре бешедовали и фаховци за загрожени язики з Голандиї и Портуґалиї.
Як преноши портал Суботица.инфо, у мено локалней самоуправи присутних привитала совитнїца за културу др Етела Єринкич, котра з тей нагоди здогадла же свойочасово було забранєне вияшньовац ше як Бунєвац, цо приведло до того же число Бунєвцох у Суботици, дзе их дакеди було найвецей, спадло на спод 10 одсто.
Попри др Фейсу, 24. новембра на Семинаре присуствовали и предсидатель и заменїк предсидателя Рускей матки Дюра Папуґа и Миломир Шайтош и як за Рутенпрес гварел Папуґа, по преподаваньох з предсидательом Бунєвскей матки Иваном Седлаком бешедовали о дальшим сотруднїцтве двох здруженьох.