БАРДЕЙОВ (СЛОВАЦКА) – Всоботу, 12. децембра, у Бардейове у Словацкей отримани Треци Медзинародни фестивал мултижанровей русинскей музики.
Зоз Сербиї, односно спред Рускей матки, як госц, вонка з конкуренциї за награди, на Фестивалє того року наступел Владимир Малацко зоз свою композицию „На верху билих топольох”, а Фестивал провадзели и предсидатель РМ Дюра Папуґа, та Славко Пап.
У мено Шветового конґресу Русинох/Руснацох/Лемкох (ШК РРЛ), Рускей матки з нагоди 25-рочнїци снованя на Фестивалє уручени пригодни дарунок, а приял го предсидатель РМ Дюра Папуґа.
На Медзинародним фестивалє мултижанровей русинскей музики найвецей учашнїкох було зоз Словацкей, а попри зоз Сербиї, участвовали и виводзаче з Мадярскей, з Будапешту, як и з України, зоз Закарпатя (Подкарпатя), з Мукачова и Велького Бережну.
Фестивал орґанизує ШК РРЛ, а з финансийну потримовку Уряду Влади Словацкей за културу народносних меншинох.