ВЕРБАС – Скупштина општини Вербас пияток, 19. юния, вименєла Одлуку о методи приватизациї Явного подприємства за информованє Вербас(ЯП ИВ), з хтору тому подприємству оможлївени ище штири мешаци за приватизованє.
Вименка у складзе з одлуку Влади Сербиї же би ше процес приватизациї предлужело за штири мешаци, а одборнїки СО ше єдногласно зложели же подприємство треба зачувац на гоч яки способ – чи з находзеньом нового власнїка, чи з применьованьом нового моделу дїлованя, а хтори будзе у складзе зоз Законом о информованю.
Локална самоуправа би до 1. новембра мала придац нови попис и оцену маєтку, як и нову приватизацийну документацию за ЯП ИВ, а на схадзки заключене же роботнїком котри останю без роботи треба оможлївиц социялну програму, як и же треба винайсц способ финансованя ЯП ИВ за идуци штири мешаци.