О законодавних рамикох за меншини у жемох дзе жиєме

автор бхц фото маг
1.2k Опатрене

БРАТИСЛАВА (СЛОВАЦКА) – У Братислави, у Словацкей Републики, штварток, 15. децембра отримани Семинар з назву „Поровнаня у обласци обезпечованя законодавних рамикох националних правох у рамикох державох В4 (Вишеґрадскей инициятиви 4)”, дзе у двох часцох бешедоване о законскей реґулативи защити националних правох националних меншинох и етнїчних групох у Сербиї, Польскей, Ческей, Мадярскей, Горватскей и Словацкей.

Орґанизатор Семинару було Здруженє интелеґенциї Русинох Словацкей (ЗИРС), як часц проєкту „Чемерица”, хтори спомнуте здруженє витворює з потримовку Министерства вонкашнїх дїлох и европских роботох Словацкей, а присутних привитал державни секретар у Влади Републики Словацкей задлужени за национални меншини Ласло Буковски.

2-Slovacka-02

Предсидатель ЗИРС Янко Липински визначел же семинар орґанизовани же би ше видзело як держави у хторих жию Русини/Руснаци ушорели права меншинох, окреме у обласци обрзованя, участвованя у парламентарним живоце, култури.

О законох Републики Сербиї хтори чуваю права меншинох, та з тим и Руснацох, на Семинаре бешедовала народна посланїцаи и членїца Националного совиту Руснацох Олена Папуґа. Папуґова окреме визначела постоянє и одредби Закона о националних совитох националних меншинох, законох з обласци образованя, наглашела же на тим планє од Сербиї мож учиц, понеже од давна ма закони з меншинскей проблематики. Велї закони у Народней скупштини Сербиї мала нагоду и креїровац, цо окреме интересовало присутних.

2-Slovacka-03

О законох хтори ше одноша на меншини у Польскей, односно як ше вони одражую на Лемкох, бешедовал Боґдан Ґомбаль, о законох о меншинох у Мадярскей бешедовала Клаудиа Секереш, Горват з Братислави Радослав Янкович бешедовал о законодавней меншинскей леґислативи у Горватскей, Мартин Дуфала у Ческей, а Владимир Минчич, на рускинским язику, бешедовал о Русинох у Словацкей, визначуюци же Словацка нє ма закон о националих меншинох, а вон як правнїк и заняти у Министерстве правди будзе участвовац у його виробку.

На концу Семинару заключене же таки черанки искуствох и поровнованя потребне частейше отримовац, бо за розлику од спознаньох о култури и стретаня на фестивалох, о тей проблематики Русини/Руснаци о себе мало знаю. Прето потребни и фахово сходи на хторих ше визначи же руски идентитет ма преспективу и интелектуалцох котри го порушаю.

2-Slovacka-04

ПОВЯЗАНИ ТЕКСТИ