О кнїжки Латинки Перович бешедовал и др Алексей Кишюгас

автор фес
1.3k Опатрене

НОВИ САД – Вчера у новосадским „Студию М”, отримана  промоция кнїжки  историчарки Латинки Перович „Доминантна и нєжадана елита”, на хторей медзи бешеднїками бул и доцент на Филозофским факултету у Новим Садзе др Алексей Кишюгас.

Даскельо мешаци по єй обявйованю кнїжка отворела велї питаня и дилеми о интелектуалней историї Сербиї, односно о людзох котри уплївовали на живот и дружтво у Сербиї у 19, 20. и на початку 21. вику и на єден способ були елита дружтва хторе и дзень-нєшка „храме”.

У кнїжки описани 13 портрети, котри Перовичова так поскладала же наспрам Добрици Чосича – Марко Никезич, Коча Попович, Милован Дїлас, Иван Дюрич, Новак Прибичевич, Слободан Инич, Иван Стамболич, Олґа Попович Обрадович, Сима Чиркович, Зоран Дїндїч, Боґдан Боґданович и Радомир Констатинович.

Попри спомнутого др Кишюгаса, та авторки, на промоциї бешедовали поблициста  зоз Заґребу Славко Ґолштайн, проф. др Любодраґ Димич, историчар и член САНУ з Беоґраду, писатель з Беоґраду Светислав Басара, новинар з Нового Саду Димитриє Боаров и историчар з Беоґраду проф. др Милан Суботич, рецензент спомнутей кнїжки.

Поведзене же ше ключне подзелєнє на доминантну и нєжадану елиту збуло ище давного  1878/88. року, кед на политичну сцену вишла радикална, народняцка странка, и такповесц порихтала терен за шицко цо було познєйше. Наспрам тей идеї и елити, меншинска, нєжадана, либерална и проеврпска елита була и остала на марґини од 80-тих рокох 19. вику. Шицки пробованя же би ше з реформами стануло на ноги – спадли. Перовичова гвари же Сербия  уж вик и пол остала и далєй  вирна еґалитарней, колективистичней, народнячкей и националней идеолоґиї.

Исоричарка Латинка Перович була секретарка Централного комитету Союзу комунистох Сербиї и припадала либералному партийному руководству, хторе пре  обтужби за „либерализам” зменєне 1972. року. Дзекуюци и тому же шицки особи   хтори описани у кнїжки барз добре познала, читачом понукла материял з хторого годни лєпше зрозумиц историю нашей жеми.

ПОВЯЗАНИ ТЕКСТИ