НОВИ САД – Вчера, 5. новембра, у просторийох Медия центру Войводини Нєзависного дружтва новинарох Войводини (НДНВ) отримана панел-дискусия з тему „Шлєбода виражованя войводянских националних заєднїцох”.
Сход орґанизовало НДНВ, а на спомнуту тему бешедовали шеф Оддзелєня за медиї Мисиї ОЕБС-у у Сербиї Ґордана Янкович, заменїца Покраїнского омбудсмана за защиту правох националних меншинох Ева Вукашинович, експерт за меншински питаня Мирослав Кевежди (котри и член Националного совиту Руснацох) и професор на универзитету Алпар Лошонц.
У уводних викладаньох учашнїкох спатрени проблем шлєбодного виражованя меншинских заєднїцох з вецей аспектох: правного, аспекту досягох здобутих шлєбодох у Европи, як и числених препреченьох у витворйованя корпусу тих правох.
Медзи иншим, на сходзе наглашене же ше проблем шлєбоди виражованя меншинох нє може спатрац изоловано од їх здобутих правох, як и же нова законска реґулатива у тей обласци досц нєясна, нєпрецизна и нєдоповедзена, насампредз пре нєуважованє предкладаньох националних совитох меншинох.
Попри других представительох з нашей заєднїци, на панелу присуствовали и заменїк предсидателя Националного совиту Руснацох Йовґен Мудри и одвичательни редактох новинох „Руске слово” др Борис Варґа.