МИКЛОШЕВЦИ (ГОРВАТСКА) – У грекокатолїцкей церкви Рождества Пресвятей Богородици у Миклошевцох вчера, 16. октобра, миклошевски парох и викар славонско-сримски Крижевского владичества о. Яким Симунович з вирнима преславел 45-рочнїцу свойого пошвецаня за священїка и 40 роки духовного служеня у тим месце.
По Служби Божей, хтору и предводзел, о. Симунович подзековал вирним на добрим и длугорочним сотруднїцтве, на отримованю вири и духовного живота. Тиж так, здогаднул на 160-рочнїцу народзеня и 43 роки службованя у Миклошевцох о. Владимира Лабоша, котри пред 110 роками участвовал у будованю терашнєй миклошевскей церкви. Тот ювилей будзе означени идуцого року.
З пригоднима писнями поетеси Меланиї Римаровей, у мено Церковного одбору и шицких вирних, о. Симуновичови повинчовали школяре Анамария и Матей Мудри.
На концу тей пригодней шветочносци числени вирни о. Якимови Симуновичови повинчовали и з Многолїтствийом, и пожадали же би ше у Миклошевцох и надалєй очувало виру и затримало духовни и традицийни звичаї.