КОЦУР – Вчера, 18. януара, у Велькей сали Месней заєднїци у Коцуре Фодбалски клуб „Искра” отримал Рочну скупштину, на хторей присуствовали коло 50 члени и симпатизере Клуба.
Звит о роботи за прешли рок поднєсол предсидатель „Искри” Радислав Сталевич у котрим оценєл же друга половка рока була вельо успишнєйша од першей, а наявел и плани за чечуци рок.
Єден зоз главних цильох по початок ярнєй часци сезони то змоцнїц бавяцки кадер и пробовац затримац перше место на таблїчки у Подрученй лиґи Суботица котре „Искра” освоєла у єшеньскей часци сезони. Тиж так, предсидатель Сталевич присутним пречитал и нови правилнїк о наградзованю бавячох.
Тренер Клуба Александар Петрович поднєсол звит о своєй роботи, у котрим визначел одличну атмосферу у екипи, а як єдину неґативну заувагу визначел нєпорядне одволованє бавячох на тренинґи.
На Рочней скупштини присутни мали нагоду чуц и информациї о финансийним стану Клуба зоз звиту котри пречитал Владимир Цап.
Як и каждого року, на Скупштини преглашени и найлєпши бавяч ФК „Искра” у прешлим року, а тото припознанє того року достал Павле Дякович.
На Скупштини преширене и руководство, та за нових членох Управи предложени и вибрани Дамир Ґубаш, Предраґ Адамович, Златко Колєсар и Оґнєн Бркич.
