МЕДЗИЛАБОРЦИ (СЛОВАЦКА) – У Медзилаборцох, у Словацкей, од 24. по 26. юний отримани познати Фестивал култури и спорту, 54. по шоре, на хторим присуствовала и делеґация Рускей матки (РМ) Сербиї, у хторей були предсидатель Матки Дюра Папуґа, його заменїк Миломир Шайтош и член РМ Славко Пап.
Попри провадзеня програмох Фестивалу, делеґация РМ була учашнїк означованя велького ювилею – 25-рочнїци отримованя Першого Шветового Конґресу Русинох/Руснацох/Лемкох (ШК РРЛ), хори праве у Медзилаборцох отримани 1991. року, а чий снователь и єден з перших учашнїкох була и РМ.
З тей нагоди 24. юния на Музею модерней уметносци Ендия Варголи одкрита Памятна плоча – на будинку у чиїх просторийох и отримани Перши ШК РРЛ. Памятну плочу вєдно виробели Шветова рада Конґресу, место Медзилаборци и Русинска оброда Словацкей, а шветочно ю одкрили терашнї предсидатель Шветовей ради др Штефан Лявинец з Мадярскей, городоначалнїк Медзилаборцох инж. Владислав Вишньовски и почесни предсидатель ШР, адемик Павел Роберт Маґочи з Канади.
На одкриваню Памятней плочи и пригодней шветочносци з нагоди 25-рочнїци ШК РРЛ присуствовали и делеґациї других членїцох-сновательох ШК, як и дзепоєдни терашнї члени Шветовей ради РРЛ.
Под час Фестивалу у Медзилаборцох делеґация РМ мала и вецей розгварки з одвичательнима русинских фестивалох и манифестацийох у Словацкей, а бешедоване и о заєднїцких апликованьох до фондох ЕУ. Тиж бешедоване и о отримованю першого Фестивалу русинского филму „Русин Филм Фест”, хтори 1. и 2. октобра будзе у Шидзе, а делеґация Матки нащивела и даскельо места у околїску Медзилаборцох.
На концу нащиви делеґациї РМ уручена поволанка Рускому културному центру з Нового Саду же би участвовал на шлїдуюцим, ювилейним, 55. Фестивалє култури и спорту у Медзилаборцох 2017. року.