Була перша жена дипломовани инжинєр хемийней технолоґиї у фабрики „Победа”, барз почитована. Обишла швета, бешедовала на вецей язикох и сама ше старала о синови. Була вредна, и способна, жила так як у тедишнї час жили жени интелектуалки. Вше опрез часу, циха, а така достоїнствена.
Катастрофа Першей Шветовей войни лєм цо прешла, кед ше на єдним з керестурских салашох народзела Амалия Джуня. И праве теди кед уж могла сама старгнуц узрету черешню з древа, зло ше ознова розширело по цалей жемовей кулї.
Анї дома нє було мира. Амалийово мац и оцец ше розишли и кажде пошол на свой бок. Притулєна ґу мацериней сукнї Амалия памета части селєня, очуха Кирила Шовша, а окреме хвильку кед ше народзел брат Дюра.
– Мац була строга, любела шор, вельо сом од нєй, свидомо або нє, попреберала. Очуха паметам по найкрасшим. Бул учитель, єден час робел у Торжи и бул барз добри чловек. Думам же одбавел вельку улогу у моїм живоце – приповеда Амалия надпоминаюци же була барз упарта у дзецинстве, а очух сцерпезлїви.
– Була сом твардоглаве дзивче. Кед ме дали до економскей школи, я до нєй нє сцела ходзиц. Нє сцела сом буц тарґовкиня. Цо могли мойо, мушели ми попущиц, та сом ше школовала у Ґимназиї у Новим Садзе дзе сом закончела и Висшу педаґоґийну школу. Кажди дзень сом преходзела коло готелу „Путник”, дзе грал єден бенд, а у нїм и шумни челєднїк на гушлї. Накадзи ме видзел, прибегнул одпровадзиц ме по школу. Бул студент медицини, алє и прави маестро на гушлї, Иван Марошевич – мой будуци супруг.
И гоч длуго нє приставала на одаванку, Амалия твердзи же нє була такой така залюбена, но пре Иванов шарм, начитаносц, алє и обецунку же ше поберу аж док и вон закончи студиї, обидвойо одходза жиц до Беоґраду.
СЦЕЛИ НАС ЗАШТРЕЛЇЦ
– Иван грал и путовал, та ше раз з музичарами нашол у Риєки. И я пошла вєдно з нїм, алє „брухата”, бо сом забрляла дибидус. Мали зме план – илеґално сцекнуц до Америки ґу мойому дїдови, алє нам пошло наспак. Влапели нас комунисти, а то було по законченю Другей шветовей войни. Построєли нас ґу муру за штрелянє. Нє знам о чим зме теди роздумовали, алє я нє могла вериц же нам там будзе конєц. Мала сом право, баржей нам грожели, а єден ме длуго шацовал, посановал, та нас на концу пущели – приповеда Амалия.
Иван пошвидко зохабел студиї и достал роботу у оркестру новосадского театра (СНТ). Амалия ше надумала далєй школїц. У Любляни ше уписала на Машински факултет, а пейдзешатих рокох прешлого вику, єй мац и очух ше преселєли на Текиї до Петроварадину, та бул хто чувац малого Ґеорґа (Дюру, Амалийового и Иванового сина. Амалийов Брат Дюра бул у Беоґрадзе на студийох ветерини.
– Мац ми гуторела – „Сину, лєм ти уч, раз ци будзе требац…” Вше сом бегала з кнїжками, раз з математику, раз зоз физику и хемию. А на другим боку, у бенду у хторим Иван грал, шпивала ридко красна Адела. Залюбели ше, вон до нєй, а вона до ньго. Гварела сом Иванови – розидзме ше достоїнствено. Так и було, штварток зме ше розишли, а всоботу пришол зо мну попиц кафу. А вше зме зато мали интересантни теми, обидвойо зме любели литературу, лєбо теми о космосу… Наш Дюра теди мал штири роки.
Велї ше єй познєйше опитали же чом ше и други раз нє одала, а вона гуторела:
– Раз сом з главу до мура вдерела, тото вецей нє зробим – одлучна була Амалия хтора до конца отримала слово.
ТРЕБАЛА БУЦ ГЛАВНИ ИНЖИНЄР
Ище док Джуньова була з кнїжками на драги Любляна–Нови Сад, умар очух, а и мац ше похорела – памета Амалия кед мушела покладац испити, давац годзини з математики, сама ше старац о синови и хорей мацери. У новосадкей фабрики „Победа” (метална индустрия), препознаваю єй талант, мудросц, алє и упартосц и помагаю єй зоз стипендию же би цо лєгчейше закончела факултет. Там и роботу достава. У историї того подприємства останє записане же Амалия Джуня була перша дипломована инжинєрка хемийней технолоґиї. Могла робиц цо сцела, понукали єй и место главного инжинєра, проєктантки, а вона змахла з руку, подзековала на чесци и гварела же нє люби розказовац. Отамаль, после 25 рокох пошла до пензиї.
Амалия ше сама старала о синови Ґеорґови, хтори одмалючка бул балетан. Наздавала ше же вон раз пойдзе на Ломоносов лєбо на Универзитет до Паризу. Прето робела два роботи, кед ше врацела з фабрики, понагляла до хемийскей чисцальнї хтору отворела же би могла лєгчейше сина вишколовац. Дюра, балетску школу предлужує у Инсбруку, но случело ше тото на цо нїхто нє раховал – перспективни балетан зламал ногу, та студиї предлужел на другим конаре – Академиї уметносцох. Нєшка є познати и припознати скулптор, хтори зоз супругу жиє у Нємецкей. Амалийов брат Дюра, ветеринар, з фамелию у Америки.
ШЕЙСЦ ЯЗИКИ БЕШЕДОВАЛА
Амалия Джуня цалого свойого живота була панї. И попри тим же вельо робела, мала часу пойсц до театру, читац кнїжки, поволац до себе пайташки. Швета обишла праве прейґ фирми у хторей робела. Шейсц язики бешедовац знала, лєм єдно нє. Гвари же ше нє знала повадзиц. „Императив” и „компаратив” нїґда нє любела, поцешена же ше у живоце нї зоз ким нє прегварела.
Полна бешеди, з персценьом на руки и нафарбенима ґамбами, ище вше ма бистри розум и ясну думку. Барз ше радує кед дахто задурка на єй дзвери, окреме приятельком, Агнетки и шестринїци Марленки… Идуцого мешаца ма преславиц свой 95-ти родзени дзень, та каждого хто зашол, поволала. Гоч найблїзши розошати по швеце, випатра же нємали квартель у Темеринскей концом юлия будзе полни.
Часто то у живоце так. Тото цо вредзи, нє тирва лєм за єден час. Кеди-теди виплїва зоз забуца…
И ПРЕЗ ДЗЕНЬ И ВНОЦИ
Уж штири роки о Амалиї ше стара Верица, родом з Коцура. Гвари же нїґда нє забудзе кед ю Амалия прияла до себе, и понукла єй роботу, теди кед єй у живоце було найчежше.
– Любов – за любов, гвари Верица, хтора кажди дзень ма на розуме же би Амалиї у дзешатей децениї живота було цо лєгчейше.