БЕОҐРАД – Народна посланїца Лиґи социялдемократох Войводини Олена Папуґа вчера у Народней скупштини обрацела увагу на чежку ситуацию роботнїкох АД „Кулски штофи” Кула, та министрови за роботу, обезпечованє роботи, борецки и социялни питаня Александрови Вулинови поставела питанє прецо у тей фабрики нє запровадзена социялна програма, понеже була у державней власносци, преноши Бета, а локална информацийна мрежа „Наше место” (www.nasemesto.rs) питаня Папуґовей обявела у цалосци.
Кулска штофарня у юлию 2010. року пошла до предликвидациї, а за управнїка меновани Милорад Вельович, котри мал виробиц социялну програму. Теди у фабрики були заняти 212 роботнїки, котри подписали колективни контракти, мали ришеня о роботи, спецификациї роботних местох по бодох. Медзитим, спомедзи 212 роботнїкох, лєм 130 з Фонду солидарносци достали по 184 759 динари, та ше Папуґова питала прецо єдни достали пенєж, а други роботнїки нє, и прецо нє виробена социялна програма, цо була законска обовязка предликвидацийного управнїка – наводзи сайт „Наше место”.
Понеже маєток АД „Кулски штофи Кула” под гипотеку, нєт можлївосци предац го, та народна посланїца з кулскей општини поставела и питанє хто тераз хаснує и управя з маєтком штофарнї.
Бувши роботнїки – предликвидацийни поверителє – приявели поглєдованя на основи нєвиплаценого заробку у поступку предликвидациї, медзитим Привредни суд у Зомборе прияви нє прилапел, з толкованьом же су нє благочасови. Роботнїки глєдали дополююцу судску розправу, алє ше предликвидацийни управнїк вияшнєл процив, толкуюци же прияву придали после законского термину. З оглядом же поглєдованя нє припознати у поступку предликвидациї, бувши роботнїки при Фонду солидарносци нє могли витвориц права на виплацованє.
На концу свойого викладаня Олена Папуґа здогадла же Кула дакеди була позната по розвитей индустриї, та 1984. року у кулскей индустриї були заняти 12 000 особи, а тераз их єст 800.