БЕОҐРАД – Посланїки Скупштини Сербиї вчера прилапели Одлуку о виборе членох и заменїкох членох 19 стаємних одборох Скупштини и одбору за права дзецка, як окремного роботного цела, з чим заокружени процес конституованя републичного парламенту и закончена перша схадзка нового зволаня Скупштини, хтора почала 3. юния.
Як стої на службеним порталє Народней скупштини Републики Сербиї, народна посланїца Олена Папуґа з Руского Керестура, як членїца посланїцкей ґрупи Лиґи социялдемократох Войводини-Желєна странка, вибрана до двох скупштинских одборох.
Папуґова вибрана за члена Одбору за людски и меншински права и ровноправносц полох и за член Одбору за польопривреду, лєсарство и водопривреду. Обидва одбори маю по 17 членох.