НОВИ САД – Предсидатель Асоцияциї польопривреднїкох Мирослав Киш виявел же парасти вчера и урядово, на писарнїцу у Влади Сербиї, придали вимогу за сход з премиєром Александром Вучичом, а пред, як гварел Киш, як принєшу одлуку о радикализациї протесту.
– Нє сиґурни зме же предсидатель Влади Сербиї цалком упознати зоз ситуацию и причинами пре хтори протестуєме уж два тижнї – гварел Киш и додал же тераз усоглашую и писмо хторе польопривреднїки пошлю Защитнїкови гражданох Сашови Янковичови.
– Од нього будземе вимагац толкованє о тим чи маме право виражовац свойо нєзадовольство з протестним воженьом, у чим нас полиция и далєй зопера, а спозориме го же ше нам, як гражданом, зоз законом загрожую права – потолковал Киш.
Предсидатель Асоцияциї польопривреднїкох наведол и же парасти протестую уж 14 днї и же нє маю намиру одустац од вимоги же би ше Закон о вименкох и дополнєньох Закона о державней польопривредней жеми поцагло з процедури.