БЕОҐРАД – Нєзадовольни парасти, члени Покраїнскей влади и други гражданє вчера опрез Скупштини Сербиї протестовали процив предложених вименкох Закона о державней польопривредней жеми, преноша нашо медиї.
– Нє будземе ше лєм процивиц тому закону, алє будземе и инсистовац най го предсидатель держави нє подпише, будземе гамовац його применьованє, а кед придземе на власц, розтаргнєме шицки контракти хтори буду подписани на його основи – гварел предсидатель Покраїнскей влади Боян Пайтич.
Вон гварел и же предложени вименки приведу до того же 100 милиони еври рочнє достаню даскельо тайкуни, место же би тот пенєж достали 15 000 до 20 000 фамелиї.
Сход потримали и ЛСВ, ДС и СДС. Лидер ЛСВ Ненад Чанак гварел же тота странка назбера 100 000 подписи, кельо потребне за розписованє референдуму.
Представитель польопривреднїкох Мирослав Киш гварел же уж вецей як 30 днї спозорюю на тото же Закон нє добри и же го треба поцагнуц зоз скупштинскей процедури. Медзи другим, парасти нєзадовольни же 30 одсто обрабяцей жеми будзе дате єдней правней особи у општини на хаснованє, а на период од 30 роки.
СНС оценєла же ше вчера опрез Скупштини зишли „найвекши крадоше у историї Сербиї”, котри польопривреднїком роками брали хлєб з устох, а державну жем давали праве тайкуном.
