Дакеди нашо ґаздинї пред тим як почали печиц паску, преошали билу муку и порихтали заправку. Заправка ше рихтала так же ше до литри млєка положело єден квас, два ложки цукру и єдну ровну ложку солї. До того ше додало єден або два жовчки и дакус масци (нєшка ґаздинї кладу кус олєю).
И нєшка ше у велїх обисцох паску рихта праве так, по стародавнє. Заправку кладу до муки, уж порихтаней у ванґлочки, най дакус викишнє. Цесто затрепу, а кед викишнє (о годзину и пол, два ) цесто подзеля на тельо часци кельо ше пасочки сце упечиц. Вигнєце ше кажде цесточко и положи до помасценей и помученей тепши. На верх ше кладзе ружичку. Цесто ше нашулька, розженє и з єдного боку позарезує на ройти. Таку пантлїку ше скруци и положи на верх нєупеченей паски. Же би ше затримала на верху, до нєй треба заджобнуц зубодлобку.
Паски мож и иншак украшиц. Зоз пантлїчкох мож направиц варґочи, або лєм шульканци, та вец по паски покруциц.
Цалу паску ше на концу премасци зоз розтрепаним вайцом и охаби най подкишнє. Паску ше пече коло пол годзини, а горуцу, виняту з релни ше помасци зоз марґарином або олєйом.
Дзецом ше дакеди зоз цеста правело голубки так же ше шульканци завязало на ґузел.
На фотоґрафиї и рижни способи украшованє паски.
