ҐОРЛИЦИ (ПОЛЬСКА) – Початком юния ше наполнєли пейц роки од снованя лемковско/русинского ЛЕМ.фм радия и 25 роки обнови Рускей берзи, єдней з главних лемковских орґанизацийох у Польскей.
Интернет ЛЕМ.фм радио Рускей берзи зоз своїма рижнима образовнима, информативнима, културнима и забавнима програмами барз популарни нє лєм у Польскей, алє медзи Русинами у штреднєй Европи и у швеце, часто преноши и информациї о Руснацох у Сербиї, аж мал и серию емисийох у хторей читани приповедки з кнїжки Ирини Гарди Ковачевич „Нєбо над Керестуром”. ЛЕМ.фм Радио мож слухац на адреси www.lem.fm
Ґрупа (портал) ЛЕМ.фм нєшка нє лєм радио, чий снователь Боґдан Ґамбаль, алє представя єден з фундаментних каменьох на хторих збудовани лемковски идентитет и култура, а при Рускей берзи, односно Лем.фм, од нєдавна роби и интернет-тижньовнїк ЛЕМ.фм, як панрусински.
Руска берза найстарша лемковска дружтвена орґанизация, основана 1908. року у Ґорлицох, алє после одредзеней, пре рижни историйни обставини длугей прерви, єй дїялносц обновена 1. юния 1991. року.
Пред 25 роками здруженє обновене и од того часу интензивно дїлує на велїх просторох повязаних з лемковским идентитетом. Главне шедзиско Здруженя и далєй у Ґорлицох, у историйним будинку, алє члени и сотруднїки Рускей берзи дїйствую на подручу цалей Лековини и по рижних городох у Польскей, як цо то у Кракове, Варшави, Леґници, алє и поза гранїци – вшадзи дзе жию Русини – у Словацкей, України, ЗАД и других жемох.
Главни задатки Рускей берзи то отримованє и подзвигованє лемковского идентитету прейґ образовних, културних, воспитних, информативних наукових, видавательних змистох, а у єй рамикох роби и „Библиотека лемковскей класики”, архива и Спомин-хижа писателя Ивана Русенка.
Руска берза и снователь лемковского ЛЕМ.фм радия, Ансамблу „Терочка” и театралного „Терка”.
З нагоди ювилейох, 18. юния у Рускей берзи будзе отримане пригодне стретнуце, на хторим вони достойно буду означени.