РУСКИ КЕРЕСТУР – На предкладанє предсидателя Совиту Месней заєднїци (МЗ) Руски Керестур Владимира Олеяра, члени Совиту на вчерайшей схадзки принєсли одлуку о зменшаню його волонтерского додатку за окончованє тей длужносци з 20 000 на 10 000 динари мешачно, а тот звишок пенєжу у тим року будзе унапрямени на дотациї дружтвеним орґанизацийом. Як поведзене, волонтерске надополнєнє Олеярови до конца мандату будзе 10 000 дин., а идуцого року ше 120 000 дин. на рочним уровню унапрями з финансийним планом.
Понеже терашнї керестурски самодопринос виходзи у януаре идуцого року, на вчерайшей схадзки Совиту МЗ почала начална розправа о потреби и можлївосцох за заводзенє нового, а розправа будзе и надалєй, як на Совиту, так и на уровню здруженьох гражданох, познєйше и цалого валалу.
На тей першей розправи члени Совиту векшином, у началє, указали на потребу за дальше заводзенє самодоприносу, можебуц з меншима процентами видвойованя, гоч пре нови законски предписаня дакус очежанша и часово длугша процедура витворйованя планованей програми. Шицки вчера присутни члени Совиту виражели и обаванє чи будзе вигласани, алє, як гварене, кед ше опредзелї за заводзенє нового самодоприносу, потребне орґанизовац и широку кампаню за його прилапйованє.
На дньовим шоре було и розподзельованє пайпох хтори после остатнього ушорйованя яркох остали нєвихасновани у ЯКП „Руском”, так же шицки заинтересовани Керестурци котрим су потребни – най ше явя секретарови МЗ, а годно достац найвецей по 4 пайпи.
Позитивно ришена молба Месней орґанизациї Союзу инвалидох же би ше им одобрело хаснованє заєднїцких просторийох за роботу здруженьох у Спортскей гали, а молби вязани за комунални роботи буду прешлїдзени до ЯП „Завод за вибудов” Кула. Молби хтори ше одноша на ушоренє атмосферскей води буду ришовани док у Керестуре почнє тогорочне ушорйованє яркох, поведзене на схадзки Совиту.
Вязано за лєтню заграду опрез Мензи, одлучене же Совит МЗ до Општини Кула пошлє урядову вимогу за толкованє чи є леґално поставена и же би ше му доручело документацию о єй постявяню, як цо то и студия о оправданосци такого обєкту, понеже то, як гварене, явни документи.
За нєдавно поставени знаки о забрани паркованя у центре Керестура, на Совиту поведзене же ше вони одноша лєм на забрану застановйованя и паркованя превозкох на драги, а нє и коло драги.
На схадзки Совиту присуствовали и одборнїки у Скупштини општини Кула з Керестура – Мария Шепински и Владимир Варґа.
