На чолє двох з трох институцийох чий снователь, лєбо соснователь Национални совит Руснацох, прешлого тижня случели ше кадрово пременки. Завод за културу войводянских Руснацох и РНТ „Петро Ризнич Дядя” по вибор директорох буду водзиц окончовательки длужносци.
Понеже директора Заводу за културу войводянских Руснацох мр Серґея Тамаша Покраїнска влада 20. юлия поставела за помоцнїка Покраїнского секретара за привреду и туризем на штиророчни период, Тамаш дал задзекованє на длужносц у Заводу. За окончователя длужносци директора Заводу за културу войводянских Руснацох Национални совит Руснацох предложел Ивану Дудаш з Руского Керестура, мастер инженєра менаджменту, котра дотераз була директорка Руского народного театру (РНТ) „Петро Ризнич Дядя”.
Прето Ивана Дудаш дала задзекованє на место директора РНТ „Петро Ризнич Дядя”, а за о.д. директора нашого националного театру НС Руснацох, як снователь, меновал Таню Арва Планчак, секретара НС, котра дотераз була и член Управного одбору РНТ, так же Арва Планчакова дала задзекованє на членство у Управним одборе Театру. То би, вокраци, бул резиме кадрових пременкох хтори ше прешлого тижня случели у наших институцийох, а хтори би мали обезпечиц континуитет роботи Заводу и Театру покля по порядней конкурсней процедури нє достаню руководзацих., односно директорох, у полним капацитету.
ЕЛЕКТРОНСКИ ОДЛУКИ
Одлуки о розришеню Тамаша з места директора Заводу за културу ВР, Дудашовей з места директора РНТ, Арва Планчаковей з членства у Управним одборе РНТ, та предкладаня за менованє окончовательох длужносцох директорох у Заводзе и РНТ принєшени на електронскей схадзки НС Руснацох, хтора отримана од стреди, 27. юлия, по 12 годзин штварток, 28. юлия. Пред електронску схадзку, стреду, 27. юлия, о тих питаньох перше бешедоване на схадзки Вивершного одбору Националного совиту Руснацох у Новим Садзе.
Спомедзи 19 членох НС „за” спомнути одлуки на електронскей схадзки гласали 11 члени,, два гласи були „процив”, а шесцеро члени Совиту нє гласали.
Предкладанє же би Ивана Дудаш була менована за о.д. директора Заводу за културу ВР, на законски предвидзени час, послате до Покраїнского секретарияту за културу, явне информованє и одношеня з вирскима заєднїцами, хтори го предложи Покраїнскей влади на менованє, як сосновательови Заводу за културу ВР.
Понеже НС Руснацох снователь РНТ „Петро Ризнич Дядя”, одлука о менованю Танї Арва Планчак за о.д. директора РНТ (на законски предвидзени час), конєчна, а понеже є розришена з членства у Управним одборе Театру, познєйше будзе меновани нови член УО.
У мандату окончовательох длужносцох, управни одбори спомнутих двох установох розпишу конкурси за директорох.
ПРЕПОРУЧЕНЯ И ДИЛЕМИ
Дотерашнї директор Заводу за културу войводянских Руснацох Серґей Тамаш гвари же и з нового роботного места предлужи помагац же би ше реализо вали активносци Заводу хтори розпочати под час його мандату:
Серґей Тамаш
– Анґажованє у покраїнским Секретарияту за привреду и туризем за мнє особне и професийне виволанє, насампредз же як три приоритети новей Покраїнскей влади представени польопривреда, привредни розвой и туризем, праве обласц роботи того Секретарияту. Медзитим, и з тей новей позициї мам намиру и дзеку помагац рускей заєднїци. Фахово, коло туристичних проєктох, а кельо годно и на други способи, понеже зме ше прешвечели кельо важне мац контакти у покраїнских орґанох, односно яки проблеми кед контакти нєт – потолковал Тамаш. Кед слово о проєктох Заводу, а єст их, Тамаш планує помогнуц новому руководству же би ше реализовали, як гвари, волонтерски и у своїм шлєбодним чаше. Починаюци од Семинара за фахове усовершованє хореоґрафох у Шидзе и Дньох рускей култури у Етноґрафским музею у Беоґрадзе, заключно по Дзень Руснацох у Бикичу на рок у януару. Потим, Завод би уж и так мушел мац нови План роботи и директора у полним мандату. Гоч конєчну оцену о резултатох на чолє Заводу за културу войводянских Руснацох охабя нашей явносци, Серґей Тамаш прешвечени же шлїдуюцому руководству охабя стабилну институцию, квалитетни проєкти и план роботи. Окреме инсистує же у евалуациї резултатох на розуме треба мац єден факт:
– Прейґ проєктох Заводу хтори нам преходзели у даскельо остатнїх конкурсних циклусох, до рускей заєднїци зме з вонкашнїх жридлох принєсли два милиони динари. Думам же то пракса хтору треба предлужиц и надалєй – суґерує Тамаш.
Одход дотерашнього директора Заводу на орґанизацийно висше роботне место нє спорни. З другого боку, поступок предкладаня окончователя длужносци чолней функциї Заводу спричинєл подзелєни реакциї у рускей явносци. Заувага дзепоєдних членох Националного совиту же у тим швидким поступку заобидзени Управни одбор Заводу, а под знак питаня кладзени и квалификациї кандидатки. Конкретно, роки искуства. Медзитим, як ше наводзи у урядовим одвиту хтори Совит дал на тоти дилеми, процедура окончена у складзе з важацима предписанями. Отже, Управни одбор, хтори главна инстанца у поступку вибору и менованя директора институциї, по Статуту Заводу за културу войводянских Руснацох нє участвує у случаю предкладаня окончователя длужносци, алє то право (со)снователя. То шлїдзи зоз ище вше важацих актох Заводу хтори прилапени по Закону о култури з 2009. року хтори кровни у тей обласци. Тот закон тиж за статус о. д нє вимага исти квалификациї, хтори муши сполньовац директор.
Кед же Покраїнска влада, хтора соснователь Заводу за културу войводянских Руснацох, потрима предклад же би Ивана Дудаш була менована за окончователя длужносци, вона прешвечена же годна адекватно водзиц тоту институцию по вибор директора, понеже ма искуство и у формалних, и у сущних аспектох рускей култури. Насампредз, же главни задаток окончователя длужносци надпатрац запровадзованє и реализацию уж постояцих програмних и финансийних документох Заводу:
Ивана Дудаш
– Квалификує ме же сом штири роки була член УО Заводу, а од 2014. року на чолє РНТ „Петро Ризнич Дядя”, хтори тиж национална установа култури, дзе сом на оперативним уровню сотрудзовала зоз Заводом за културу. Ґу тому, анґажована сом у Националним совиту на замени кнїжководителя, мам искуства з цивилного сектору, а практично сом цали живот у рускей култури, перше як виводзач, а потим и у орґанизациї – наводзи Ивана Дудаш.
ДАЛЬША ПРОЦЕДУРА
У каждим случаю, менованя окончовательох длужносци у Заводу за културу и РНТ „Петро Ризнич Дядя” лєм дочасови ришеня хттори маю обезпечиц порядне функционованє тих институцийох. Тирваци кадрово ришеня достанєме аж док ше по явним конкурсу виберу директоре на полни, штиророчни мандат.
У медзичаше, як толкує предсидателька Управного одбору Заводу за културу войводянских Руснацох Анамария Регак, нєобходне присподобиц сновательни акти и статути ґу новому Закону о култури, же би ше поступок вибору окончел на предписани способ:
– Понеже зоз Законом о вименкох и дополнєньох Закона о култури (“Сл. гласник РС”, бр. 13/2016 и 30/2016 – испр.), пременєни дзепоєдни условия за вибор директора, насампредз же кандидат муши мац високе образованє и пейц роки искуства у фаху, и предложиц програму роботи и розвою установи, Управни одбор Заводу перше муши прилапиц потребни пременки и дополнєня Статута же би ше го присподобело ґу висшим актом, на цо потим согласносц муши дац Покраїнска влада. Вец достанєме потребни предусловия же бизме по порядней процедури розписали конкурс за директора – потолковала шлїдуюци крочаї предсидателька УО Заводу Анамария Регак.
Предписаня нє дефиную тирванє о. д. стану, та ше у случаю руских институцийох чека толкованє Покраїнскей влади, алє найдлугши можлїви период єден рок, по чий конєц треба розпочац процедуру вибору. У обидвох случайох, барз би добре було, кед и нє нєобходне, же би тот процес бул покончени цо скорей, же би до Нового року и Завод и Театер вошли з руководзацима у полним мандату, и з їх автентичнима планами роботи и финансованя.