ВЕРШЕЦ – У Вершцу 3. и 4. децембра отримане перше стренуце младих у рамикох проєкту „Карпатски паралели”, хтори витворює Завод за културу войводянских Руснацох.
У проєкту, хтори потримала Фондация за отворене друштво, участвую двацецеро млади рускей, сербскей, словацкей и румунскей националней заєднїци, так же на тим першим стретнуцу були школяре Ґимназиї „Петро Кузмяк” з Руского Керестура, Ґимназиї и економскей школи „Светозар Милетич” зоз Србобрану, Ґимназиї „Михайло Пупин” з Ковачици и Ґимназиї „Борислав Петрович Браца” з Вершцу, а школярох провадзели їх наставнїки.
Школяре у рамикох проєкту „Карпатски паралели” през друженє на трох стренуцох буду глєдац заєднїцки елементи хтори формовали културу сербскей, рускей, словацкей и румунскей заєднїци за остатнї скоро три вики їх присуства и живота на просторе терашнєй Войводини. Тот заєднїцки елемент то и барок, нє лєм як уметнїцки напрям, алє и як култура живота хтора уплївовала и на терашнї часи.
Проєкт „Карпатски паралели” почал у септембру того и будзе тривац по 30. април 2017. року, а попри стретнуца у Вершцу, у його рамикох буду стретнуца младих у Ковачици и Руским Керестуре.