БИКИЧ – Восботу, 20. фебруара, у Доме култури у Бикичу отримана шветочносц з нагоди промоциї першого компакт-диску (CD) хтори зняла Мишана шпивацка ґрупа Културно-просвитного дружтва „Иван Котляревски”, з назву „Хижочко стара”.
На ношачу звука єст 18 шпиванки, а промоция отворена з композицию „Хижочко стара”, за хтору текст написал дакедишнї учитель у Бикичу Михайло Ковач.
Под час промоциї одшпивани даскельо шпиванки хтори зняти на CD-у, а шпивали жени окреме, потим вєдно з хлопами, а єдну шпиванку одшпивали и сами хлопи.
Попри промоциї CD-у, публики представена и робота Шпивацкей ґрупи од єй снованя 2009. року по нєшка, як и числени наступи у жеми и иножемстве (Словацка, Польска и Горватска), цо нащивителє могли видзиц на видео-биме.
Як госцински наступела Шпивацка ґрупа Словацкого КУД „Єднота” зоз Шиду, хтора ше представела з венчиком словацких народних шпиванкох, а одшпивали и єдну руску – „А од Прешова”.
Шпиванки за CD зняти у Студию „Жежель” з Нового Саду, фотоґрафиї за рамик виробел „Фото ателє 78” зоз Шиду, видруковани є у 200 прикладнїкох и кошта 300 динари.
Видаванє CD-у финансийно помоги Национални совити Руснацох, КПД „Иван Котляревски” и спонзоре.