Перши Саям проєктох Европскей униї у Сербиї

автор там
917 Опатрене

БЕОҐРАД – Перши Саям проєктох хтори Европска уния (ЕУ) потримала у Сербиї отримани вчера у Беоґрадзе, у орґанизациї Делеґациї Европскей униї у Републики Сербиї, Канцелариї за европски интеґрациї Влади Републики Сербиї и Информацийного центра ЕУ.

Саям, на хторим представена селекция успишних проєктох финансованих зоз средствами ЕУ од 2000. року дотераз, отворели шеф Делеґациї ЕУ у Сербиї Майкл Девенпорт и министерка без портфеля задлужена за европски интеґрациї Ядранка Йоксимович.

Шеф делеґациї ЕУ Девенпорт на отвераню Сайму гварел же з Владу Сербиї пошвидко будзе подписане финансийне спорозуменє о новим пакету помоци з ИПА-фондох, за период од 2014. по 2020. рок, у суми 189 милиони еври. Найвекша часц, 72 милиони, предвидзени за обнову и реконструкцию подручох очкодованих од вилївох, як и за превентивни мири од вилївох.

На 11 штандох представени 15 сектори зоз 60 проєктами хтори финансовани зоз средствами ЕУ, а од 2000. року дотераз, средства ЕУ-ґрантох опредзелєних до Сербиї виноши скоро три милиярди еври, гварел Девенпорт.

Министерка Йоксимович гварела же циль Сайму посцигованє лєпшей видзеносци хаснованя ИПА-фондох и же од 2015. року новосц у конкурсох секторски приступ, як цо то панованє права, енерґетика, польопривреда и защита животного штредку.

На Сайме були и представителє програмох на руским язику Явней медийней установи Радио телевизиї Войводини, Заводу за културу войводянских Руснацох и НВУ „Руске слово“.

OLYMPUS DIGITAL CAMERA

ПОВЯЗАНИ ТЕКСТИ