РУСКИ КЕРЕСТУР – У керестурским хотаре штварток, 2. юлия, спадли перши одкоси жита у тогорочней жатви, а перши количества ше на трох одкупних местох у валалє виплацує такой ютредзень по одкупу. Вчерайша аконтна цена жита була 15,5 динари за кґ, з ПДВ.
Перши нєвельки количества вчера одкупели у подприємстве „Юарбис”, з влагу од 12 до 13 одсто, цо у рамикох стандарду, и з одвитуюцу гектолитерску чежину зарна. Як дознава Рутенпрес, векшина парастох гвари же им штреднї урожай жита виходзи коло 40 метери по гольту.
Подобни податки достати и у подприємстве „Аґро-Хома”, дзе по вчера одкупели 70 тони жита, зоз стандардну влагу и квалитетом зарна.
Вчера одкуп почала и кулска „Житобчка”, хтора на одкупним месце у Руским Керестуре (на дакедишнєй „Економиї”) превжала перши 15 тони урожаю, а податки о влаги и квалитету зарна подобни як и у других подприємствох.
Як гварел аґроном Владимир Тиркайла, жатва почала, медзитим, жито нєєднак дозрете прето же є нє нараз пошате. Дозреванє завиши и од сорти и третированя, та нє мож оценїц покля потрива.
З початком жатви, члени керестурского Добродзечного огньогасного дружтва почали дежурац у своїх просторийох.