РУСКИ КЕРЕСТУР – У рускокерестурскей парохиї св. оца Миколая вчера, на швето Пресвятей евхаристиї, осемнацецеро хлапци и дзивчата на Дзецинскей Служби Божей на 11,30 г. прияли Першу св. причасц, а дзень пред тим першираз ступели и до Свягей тайни споведзи.
Службу Божу служел капелан о. Владимир Медєши, котри и попричащал седем дзивчата и єденац хлапцох (з котрих єден з Кули) – школярох єдного оддзелєня другей класи основней школи, дзе ше за тоту подїю пририхтовали на годзинох виронауки з вироучительку Златицу Малацко, як и на парохийней виронауки зоз ш. Веронїку.
На Служби Божей о тим важним духовним дожицу наказовал парох о. Михайло Малацко, котри визначел же Св. причасц то сам Господ Бог, котри нас безгранїчно люби.
На концу Служби и першопричашнїки пририхтали кратку програму, подзековали парохови, родичом и шицким котри их рихтали за тоту подїю, а потим з другима меншима дзивчатми участвовали у процесиї коло церкви зоз Святима тайнами, одн. Евхаристию.
На концу, парох о. Малацко им у церкви подзелєл и Спомин на Першу св. споведз и Причасц, у присустве їх родичох, родзини и других парохиянох.