СРИМСКА МИТРОВИЦА – Всоботу, 29. октобра, у Сримскей Митровици означни два значни ювилеї нашей грекокатолїцкей церкви у тим городзе – 130 роки од снованя парохиї и 110 роки од вубудови церкви Вознесеня Господнього.
Шветочносц почала з Молебеном до Пресвятей Богородици, хтори служел апостолски еґзарх за грекокатолїкох у Сербиї владика Георгий Джуджар, а сослужели домашнї парох о. Владислав Варґа, шидски парох и сримски декан о. Михайло Режак, парох у Бачинцох о. Дарко Рац и парох у Беркасове о. Владимир Еделински Миколка.
По Молебену, у парохийней сали отворена вистава документох, кнїжкох и образох, хтори свидоцтво о духовним живоце нашого народу на тим просторе Сриму.
На Шветочней академиї з нагоди ювилейох, хтора отримана у Театре „Добрица Милутинович“, городоначалнїк Сримскей Митровици Владимир Санадер наглашел же локална самоуправа вше мала добре сотруднїцтво з грекокатолїцку церкву и єй священїками и же тото сотруднїцтво треба пестовац на хасен мултиетнїчносци и мултикултуралносци Сримскей Митровици.
Ювилеї повинчовал и амбасадор України у Сербиї Олександр Александрович, котри визначел значносц грекокатолїцкей церкви и парохиї у Сримскей Митровици и подзековал на гуманитарней помоци хтора послата до України.
Винчуюци ювилеї, преосвящени владика кир Георгий Джуджар наглашел же тото цо нам зохабели предки треба пестовац и охабиц будуцим поколєньом, же би церква, хтора наш духовни дом, нє була празна, алє полна.
На Академиї нараторка Ясна Арбанас здогадла на богату духовну прешлосц парохиї и церкви, як и на шицких паноцох котри окончовали душпастирску службу у Сримскей Митровици.
З тей шветочней нагоди додзелєни и припознаня заслужним, а на Академиї наступели Хор „Гармония“ церкви Святих апостолох Петра и Павла и РКЦ з Нового Саду, Хор Руского дружтва з Митровици „Руски зарї“, ДНУК „Коломийка“ з Митровици, Дзецински хор „Сримски квиточки“, УКУД „Калїна“ з Индїї, як и солисти зоз спомнутих дружтвох.
Попри спомнутих, на шветочносци присуствовали и заменїк предсидателя Националного Совиту (НС) Руснацох Йовґен Мудри, подпредсидателька НС Наташа Еделински Миколка, представителє Сербскей православней церкви и Римокатолїцкей церкви, Заводу за защиту памятнїкох и други госци.