ПЕТРОВЦИ – Пред програму старших, внєдзелю, 7. юния, треци дзень Манифестациї култури Руснацох у Републики Горватскей отримана манифестация пошвецена дзецом „Петровски дзвончок”, на хторей участвовали школяре котри пестую руски и українски язик у ОШ „Антун Бауер” у Вуковаре и єй Подручней школи у Петровцох, мали аматере з домашнього КУД „Яким Гарди”, КУД „Осиф Костелник” з Вуковару, як и КУД „Петефи Шандор” з Ласлова.
Манифестацию привитали предсидателька Союзу Руснацох Републики Горватскей Дубравка Рашлянин и доначалнїк Општини Боґдановци спред рускей меншини Ярослав Медєши.
Єднорочну роботу на културним планє дзеци указали през рецитованє, шпиванку и танєц, а за наступ их пририхтали Аня Гришук Гайдук, Татияна Рамач, Наталия Гнатко и хореоґраф Звонко Костелник.
Окреме упечатлїви були петровски дзеци котри масовно виведли руски свадзебни обичаї, пририхтани як драмска сличка з фолклором и указали ключни обичаї нашей свадзби.