„Петровски дзвон” и у знаку 185-рочнїци приселєня Руснацох до Горватскей

автор аба
1.1k Опатрене

ПЕТРОВЦИ – Тогорочна тродньова централна манифестация култури Русинох Републики Горватскей – 43. „Петровски дзвон” внєдзелю, 5. юния закончена з манифестацию дзецинскей музично-фолклорней творчосци „Петровски дзвончок”, а потим и з манифестацию старших – „Петровски дзвон”.

На „Дзвончку” участвовали ансамбли КУД-ох з Миклошевцох, Петровцох и Вуковару, та дзеци котри виучую мацерински язик у Миклошевцох, Петровцох, Вуковаре и Старих Янковцох. Як госци були мадярски дзецински ансамбл з Ласлова и словацки з Илоку, та школяре з Петровцох котри виучую українски язик.

„Петровски дзвон” отворела предсидательки Союзу Русинох РГ Дубравка Рашлянин, котра медзи госцами окреме привитала дожупана Вуковарско-сримскей жупаниї Дьордя Чурчича, началнїка Општини Боґдановци Юрая Михайловича и його заменїкох Мариа Павловича и Ярослава Медєша, як и делеґацию Руснацох з Войводини – заменїка предсидателя Националного совиту (НС) Руснацох у Сербиї Йовґена Мудрия, предсидатель Вивершного одбору НС Желько Ковач, директора Дому култури Руски Керестур Йоакима Раца, та доаєна у рускей култури и явним живоце Дюру Латяка.

На манифестациї наступели шицки КУД-и члени Союзу Русинох РГ – „Яким Гарди” з Петровцох, „Осиф Костелник” з Вуковару, „Яким Ґовля” з Миклошевцох, КУД Руснацох Осиєк, КД Руснацох Винковци, КД „Рушняк” з Риєки, Дружтво „Калїна” з Риєки, КПД „Русинка и Русин” зоз Заґребу, та КД Руснацох „Цвелферия” з Райового Села. Наступело и Дружтво „Руснак” з Петровцох, та госцуюци ансамбли мадярского дружтва зоз Старих Янковцох, „Етно голубица” з Винковцох и КУД „Петро Кузмяк” з Нового Орахова, з Войводини.

През скоро трогодзинову програму патраче видзели фолклорни и шпивацки точки котри успишно представели руски и госцуюци дружтва, а конферансу водзела Мануела Дудаш.

Пред спомнутима програмами, дополадня на петровским теметове на памятнїк бранительох и цивилох котри погинули у Отечественей войни положени венци, а у грекокатолїцкей церкви Покрову Пресвятей Богородици у Петровцох служена Служба Божа, хтору предводзел о. Михайло Йосафат Гарди зоз Словениї, а сослужел домашнї парох о. Владимир Седлак.

Манифестация отримана под високим покровительством Совиту за национални меншини РГ, а у орґанизациї Союзу Русинох РГ и КУД „Яким Гарди” з Петровцох.

Тогорочни „Петровски дзвон” отримани у рамикох означованя 185-рочнїци приселєня Руснацох до Петровцох и Горватскей, 180-рочнїци грекокатолїцкей парохиї у Петровцох и 45-рочнїци виходзенє часопису „Нова думка”.

Вецей фотоґрафиї мож видзиц на фейсбук боку rusini.hr

ПОВЯЗАНИ ТЕКСТИ