Петровчанє стаємни учашнїки Мемориялу

автор зам
901 Опатрене

РУСКИ КЕРЕСТУР – Стаємни учашнїки Драмского мемориялу Петра Ризнича Дядї уж даскельо роки знова и Руснаци з Горватскей, з Петровцох, з КУД „Яким Гарди”,  чия драмска секция на тогорочней смотри нашей театралней творчосци госцовала вчера, треци дзень отримованя Мемориялу.

Петровчанє одбавели комедию Саву Шкобича „Кров понад главу”, текст хтори, як було чуц на сцени, написани у другим чаше, а з часци прилагодзени нєшкайшому – о бриґох младих з доставаньом квартелю и рижних нєприємних ситуацийох присутних у доходзеню до ришованя того важного еґзистенциялного проблему – як з норовами людзох, так и з бирократию. И кед уж конєчно войду до квартелю, укаже ше же є нє їх.

Представу з осмерима, преважно младима ґлумцами-штредньошколцами, режирал Томислав Рац, премиєра у Петровцох була концом марца, а у Керестуре було штварте виводзенє тей представи. Дзень пред тим, соботу, Петровчанє з исту представу були госци и Руснацох у Заґребе.

У представи „Кров понад главу” ґлумя Даниєл Вашаш, Кристиян Медєши, Мая Рац, Денис Гарди, Антун Гарди, Ана Рац, Таня Гарди и Боян Кошутич, котри вчера достал награду публики за найлєпше одбавену улогу „Брундаша”.

Вецей фотоґрафиї з представи у окремней ґалериї на початним боку нашого сайту.

 

ПОВЯЗАНИ ТЕКСТИ