НОВИ САД/ЛЬВОВ – Вчера, 16. децембра, з Нового Саду послата и пията тура гуманитарней помоци за тих цо загрожени од пошлїдкох войни у України. До Львова послати скоро цали комби гуманитарней помоци, углавним зоз шматами за дзеци, жени и хлопох.
З Нового Саду, дзе центер гуманитарней акциї, стреду послате помоц котра назберана у Сриме – у Шидзе, Бикичу и Беркасове. З розподзельованьом пиятей тури тей помоци координує дежава Україна.
Спрам остатнїх рахункох, назберани вєдно коло шейсц тони помоци, найвецей шмати, а тиж и ствари за особну гиґиєну и тирвацши поживово продукти. Помоц у шматох забера окреме вельки простор и потребно вецей превозки за єй транспортованє.
През скоро цали 2015. рок тоту гуманитарну акцию реализовали Грекокатолїцка церква (Каритас) и Инициятивна ґрупа гражданох зоз Сербиї. У скорейших штирох турох, зоз скоро шицких грекокатолїцких парохийох Бачкей и Сриме, помоц була дистрибуована до Ивано Франковска, Києва и Львова, а початком идуцого року будзе послата ище єдна, остатня тура тей гуманитарней помоци.