Пияти рок у пиджамох на журку

автор С. БАРАНЬ
983 Опатрене

У КУД „Тарас Шевченко” у Дюрдьове, всоботу, 17. октобра, уж традицийно отримани, пияти по шоре, „Пиджама парти” у орґанизациї младих зоз того Дружтва. Награди за найлєпшу женску и хлопску пижаму достали Мария Хромиш и Борис Барань зоз Дюрдьова.

Млади креативци зоз КУД „Тарас Шевченко” зоз Дюрдьова ше 2011. року зєдинєли и першираз орґанизовали тоту тематску журку. Всоботу, 17. октобра, „Пиджама парти” орґанизовани пияти раз, а нащивительох було два раз вецей як пред пейцома роками.

На тогорочним „Пиджама партию” було вецей як 250 особи, та орґанизаторе презадовольни, бо нащивеносц з рока на рок вше векша. Вибрани и побиднїки за найориґиналнєйши пиджами, котри достали дарунки − пиджами. Награду за найлєпшу женску пиджаму, як гласали нащивителє, достала Мария Хромиш, а за хлопску Борис Барань зоз Дюрдьова. Окрем у пиджамох, млади на тоту подїю приходза у папучох, з виклерами у власох, маю блишове бависко у рукох… Орґанизаторе того року направели промотивни видео знїмок з котрим поволовали младих на друженє, а їх активносци мож провадзиц на Фейсбук профилу Дружтва „Тарас Шевченко”.

Млади од самого початку мали вельку потримовку и помоц од Националного совиту Руснацох, на початку од Одбору за младеж и спорт, а того року и од Роботного цела за младих и Управного одбору КУД „Тарас Шевченко”.

УПЕЧАТКИ НАЩИВИТЕЛЬОХ

POBIDNJIKI M. HROMIS I B. BARANJ

Адриян Макаї, Коцур: Уж штварти рок нащивюєм обидва журки котри млади зоз КУД „Тарас Шевченко” орґанизую − „Гаваї” и „Пиджама”. Барз ми ше пачи атмосфера и жадам потримац младих, алє чкода же таки друженя нєт и у других наших местох.

Александар Човс, Нови Сад:

Першираз сом нащивел тоту журку, а поряднє нащивюєм „Литературни вечар младих” у Дюрдьове. Окреме ми ше пачи же ше млади маю дзе сходзиц, же су зложни и добре орґанизовани.

Ивана Торжич, Руски Керестур:

Други раз сом нащивела „Пиджама парти”. Пачи ми ше таке друженє дзе ше млади можу поупознавац. Причину за слабше одволанє младих з других местох видзим у слабей медзисобней повязаносци и контактох.

 

 

ПОВЯЗАНИ ТЕКСТИ