ВЕРБАС – Всоботу, 30. мая, у Вербаше закончени 47. Фестивал поезиї младих хтори, по словох предсидателя Совиту Фестивалу Ґорана Лабудовича Шарла и того року сполнєл обчекованя, бул искра култури и потвердзел квалитет и кед слово о младих поетох-финалистох и кед слово о госцох Фестивалу.
У рамикох богатей програми пияток, 29. мая отримана промоция кнїжки прешлорочней побиднїци – Тамари Хрин з Руского Керестура, котра за освоєне перше место як награду достала обявйованє кнїжки.
Єй збирка поезиї „Седма фарба нєба” представена у Народней библиотеки „Данило Киш”. Госцох спред Библиотеки привитала Валентина Чижмар, а о кнїжки бешедовали предсидатель Совиту Фестивалу Ґоран Лабудович Шарло и рецензент и член жирию Душан Стойкович.
Критичар Стойкович з тей нагоди визначел же поезия Тамари Хриновей ма квалитет и ориґиналносц, а як гварела поетеса, барз вельо єй значела и потримовка орґанизаторох Фестивалу, тогорочних финалистох и єй фамелиї.
Фестивал поезиї младих тирвал од прешлого вовторку по 30. май, на завераню бешедовал Перо Зубац, а у музичней часци закончуюцого вечара участвовал и бенд „Абсолутно романтичне”.