РУСКИ КЕРЕСТУР – Совит Месней заєднїци (МЗ) Руски Керестур вчера прилапел финансийни план за тот рок, а у складзе з концом рока прилапеним буджетом Општини Кула, спрам хторого цалосни приходи плановани на 22 милиони 920 000 динари.
Самодопринос предвидзени на 14 милиони 970 000 динари, а у нїм и пенєж пренєшени з прешлого року, док з буджету Општини Кула приходи буду 7 милиони 220 000 динари.
За инвестицийни роботи у Керестуре з буджету Општини предвидзени 4 милиони 200 000 динари, а 3 220 000 за функционованє МЗ, понеже Општина финансує двох занятих роботнїкох, трошки за комуналиї и струю, гориво и канцеларийни материял МЗ.
Зоз самодоприносу за инвестицийни роботи у валалє у тим року наменєни коло 12 и пол милиони динари, а милион 900 000 опредзелєни за дотациї у образованю, култури и спорту, за Фонд солидарносци и здруженьом гражданом.
Як гварене на вчерайшей схадзки Совиту, нєпотрошени пенєж зоз самодоприносу до того року пренєшени пре пожнєнє ЯП „Завод за вибудов” Кула у розписованю явних набавкох, та спозорене же то треба поробиц цо скорей и дзепоєдни плановани роботи почац накадзи дошлєбодзи хвиля.