БАЧКИ БРЕСТОВЕЦ/РУСКИ КЕРЕСТУР – Як пише портал „Наше место”, у Бачким Брестовцу 25. октобра отримане Окружне школске першенство у столним тенису за школярох основних и штреднїх школох зоз Заходнобачкого округу, на хторим участвовали и школяре рускокерестурскей Школи „Петро Кузмяк” и зазначели замерковани резултати.
Змагали ше школяре з териториї Городу Зомбор и з општинох Кула и Оджак, док школи з апатинскей општини нє мали представительох.
У екипней конкуренциї дзивчатох з основних школох (ОШ), школярки з ОШ „Петро Кузмяк” освоєли друге место. Перше место освоєла ОШ „Никола Тесла” з Бачкого Брестовцу, а треце ОШ „Никола Вукичевич” зоз Зомбора. У поєдинєчней конкуренциї Михаела Хома з керестурскей ОШ освоєла друге место.
И у екипней конкуренциї хлапцох екипа керестурскей ОШ освоєла друге место. Перши були столнотенисере з ОШ „Коста Стаменкович” зоз Сербского Милетичу, а треци з ОШ „Бранко Радичевич” зоз Стапару. У поєдинєчней конкуренциї перше место освоєл Стефан Горняк з ОШ „Петро Кузмяк” з Керестура.
Екипа штредньошколкох Школи „Петро Кузямк” була найлєпша у своєй конкуренциї и освоєла перше место, а друге екипа Штредней польопривредно-поживовей школи зоз Зомбора. У поєдинєчней конкуренциї штредньошколкох перше место у столним тенису освоєла школярка керестурскей Школи Дияна Величкович.
У екипней конкуренциї штредньошколцох Керестурци нє освоєли анї єдно место, алє у поєдинєчней конкуренциї Иґор Маньош освоєл треце место.
Шицки першопласовани екипи и поєдинци буду участвовац на Републичним першенству у столним тенису у Земуну, так же ше з керестурскей Школи на Републичне змаганє пласовали Стефан Горняк з Основней, Дияна Величкович зоз Штреднєй, як и екипа керестурскей Штреднєй школи „Петро Кузмяк”.