БАЧ – На Покраїнску смотру рецитаторох пласовали ше дзешецеро рецитаторе котри рецитую по руски, а пласман виборели после наступу на Зонскей смотри рецитаторох з општинох Заходнобачкого и Южнобачкого округу, хтора 19. и 20. марца отримана у Бачу.
У младшим возросту на Покраїнску смотру ше пласовали Катарина Недич з Коцура, Кристина Дюранїн з Дюрдьова и Ребека Семан з Руского Керестура.
У штреднїм возросту пласман на найвисше змаганє у Войводини виборели Валентина Михняк и Валентина Салаґ з Дюрдьова, та Матей Шепински з Керестура.
У старшим возросту на Покраїнскей смотри наступя Александар Планкош и Мирослав Малацко з Керестура, котри рецитую за новосадски РКЦ, та Тимеа Будински и Леонтина Штефанко з Руского Керестура.
Покраїнска смотра будзе з Сечню од 21. по 23. април, а попри спомнутих, з наших местох на Зонскей у Бачу участвовали и Михайло Ковач з Нового Саду, Ксения Вереш и Иван Молнар з Дюрдьова у младшим; Микола Еделински и Валентина Новта з Керестура, Дияна Канюґа з Кули, Милица Михальовски з Дюрдьова и Павле Медєши з Вербасу у штреднїм, та Марко Недич з Коцура у старшим возросту.
У старшим возросту по сербски ше змагали и Николета Недич з Коцура и Ана Медєши з Вербасу.
На Зонскей смотри у Бачу у трох возростох участвовали 128 рецитаторе, а оценьовала их фахова комисия хторей предсидатель бул Михайло Зазуляк з Руского Керестура, а члени Каталин Фазекаш з Нового Саду, Ядранка Каран з Бачу и Власта Ґашпарович зоз Силбашу.
