ВЕРБАС – Вчера обявени резултати змаганя на Зонскей смотри музично-фолклорней творчосци у обласци народней традициї хтора була у Червинки, и на Фестивал фолклорних традицийох Войводини з тей Смотри пласовали ше три нашо КУД и Дом култури Руски Керестур.
Зоз по двома и трома рускима народнима шпиванками на найвисшей смотри з обласци народней традициї у Войводини буду участвовац Женска шпивацка ґрупа КУД „Жатва” з Коцура, Женска шпивацка ґрупа КУД „Петро Кузмяк” з Нового Орахова и Женска шпивацка ґрупа КУД „Др Гавриїл Костельник” з Кули.
Дом култури Руски Керестур будзе участвовац зоз шпиванками трох шпивацких ґрупох – Дзивоцкей, Женскей и Хлопскей, потим з Тамбурашским оркестром, котри виводзи Венчик руских шпиванкох и Танєчну ґрупу ветеранох, з танцом „Вербунґ на Горнїци”.
Ище скорей обявене же ше зоз Зонскей смотри у Печинцох на спомнути фестивал пласовали и два шпивацки ґрупи КУД „Дюра Киш” зоз Шиду – Мишана старша и Мишана младша шпивацка ґрупа, так же на Фестивалє участвую аматере аж зоз пейцох наших местох.
Фестивал фолклорних традицийох Войводини будзе отримани 27. и 28. септембра у Вербаше.