ДЮРДЬОВ – Тогорочни 14. Фестивал жридлового шпиваня „Най ше нє забудзе” отримани вчера, 21. авґуста, у Дюрдьове. У програми наступела двацец єдна шпивацка ґрупа – у змагательней конкуренциї дзеветнац ґрупи з тринац наших местох зоз Сербиї и Горватскей и два у ревиялней часци. Побиднїк тогорочного фестивалу Дзивоцка шпивацка ґрупа Дома култури з Руского Керестура, а специялну награду достала Хлопска ґрупа КУД „Яким Гарди” з Петровцох з Горватскей.
Фестивал отворел предсидатель Националного совиту (НС) Руснацох Славко Рац, а шицких присутних привитал и предсидатель Општини Жабель Чедомир Божич. Медзи визначнима госцами на Фестивалє привитани и народна посланїца и членїца НС Руснацох Олена Папуґа, директорка НВУ „Руске слово” Мартица Тамаш, о. д. директора Заводу за културу войводянских Руснацох Ивана Дудаш, дюрдьовски парох о. Йоаким Холошняй и о. Борис Холошняй з Бечу, директорка ОШ „Йован Йованович Змай” у Дюрдьове Мария Тртич, членїца Општинскей ради Општини Жабель задлужена за културу Нерима Шовлянски, предсидатель Совиту Месней заєднїци Дюрдьов Душко Михелц, як и госци зоз Републики Польскей.
Фестивал по традициї отворел прешлорочни побиднїк – Хлопска шпивацка ґрупа Руского културного центру з Нового Саду, а потим наступели Мишана ґрупа Дружтва Руснацох у Суботици, Женска ґрупа КУД „Яким Ґовля” з Миклошевцох и Хлопска ґрупа КУД „Яким Гарди” з Петровцох з Горватскей, Дзивоцка, Хлопска и Мишана ґрупа Дома култури Руски Керестур, Младша и Старша мишана ґрупа КПД „Дюра Киш” зоз Шиду, Женска ґрупа КУД „Жатва” з Коцура, Хлопска и Женска ґрупа КУД „Иван Котляревски” з Бикич Долу, Мишана ґрупа Културного дружтва Руснацох з Винковцох, з Горватскей, Женска и Хлопска ґрупа Руского КУД „Др Гавриїл Костельник” з Кули, Женска ґрупа КУД „Петро Кузмяк” з Нового Орахова, Дзивоцка и Хлопска ґрупа домашнього КУД „Тарас Шевченко” и Мишана ґрупа КПД „Карпати” з Вербасу. Шицки учашнїки на тогорочним Фестивалу достали на дарунок пранїк.
Учашнїкох оценьовал жири у хторим були Татяна Колєсар Ґвоїч, Златица Няради, Юлиє Еделински, Йовґен Мудри и Агнета Тимко Мудри котра, як предсидателька жирия, побиднїком уручела награди. Конферансу, котру написал Яким Чапко, водзели Оля Балїнт и Тарас Чапко.
У ревиялней часци Фестивалу участвовала Женска шпивацка ґрупа „Дюрдєвак” з Дюрдьова, котра одшпивала даскельо сербски жридлово шпиванки, и Мишана шпивацка ґрупа „Ластовичка” зоз Пшемкова з Польскей, котра наступела з венчиком народних шпиванкох з Лемковщини, з Польскей.
Фестивал жридлового шпиваня „Най ше нє забудзе” находзи ше у Календаре репрезентативних манифестацийох НС Руснацох, а снователь и главни орґанизатор Фестивалу КУД „Тарас Шевченко” з Дюрдьова. Фестивал финансийно потримали Покраїнски секретарият за кулуру и явне информованє, Покраїнски секретарият за образованє, управу, предписаня и национални меншини-заєднїци, НС Руснацох, Завод за културу войводянских Руснацох, Општина Жабель и Основна школа „Йован Йованович Змай” зоз Дюрдьова.
Фото-ґалерию зоз Фестивалу нєшка обявиме на нашим сайту.