НОВИ САД – Городоначалнїк Нового Саду Милош Вучевич вчера поволал согражданох же би ше ище активнєйше и моцнєйше уключели до Гуманитарней акциї „Зоз затичку до ошмиху”, после позавчерайшей крадзи, кед зоз Здруженя гражанох „Зоз затичку до ошмиху” украднути коло два тони пластични затички, двої електрични инвалидски кочики наменєни дзецом, хтори купени за пенєж назберани з предаваня затичкох, и два бициґли. Вредносц украдзеного оценєта на коло 600 000 динари.
Як вчера сообщене, припаднїки Министерства нукашнїх дїлох у Новим Саду ришели виновне дїло тей чежкей крадзи и загарештовали штири подозриви особи – три з Нового Саду, медзи нїма и єден малолїтнїк, и єдну з подруча Жаблю.
Полиция пренашла и часц украднутих стварох и врацела их Здруженю, а у вишлїдзованю буду утвердзени шицки обставини и факти релевантни за ришенє того случаю.
У поволанки Новосадяном и дружтвено одвичательним подприємством за ище моцнєйше уключованє до спомнутей гуманитарней акциї, Вучевич осудзел крадзу и наглашел же ше таке справованє у Новим Садзе нє будзе толеровац.