КАНЇЖА – У Канїжи отримани Форум туризму, на хторим ше бешедовало о повязованю седем державох карпатского базену и хаснованю їх потенциялох за розвой туризму. Пред коло двома мешацами основана и Туристична орґанизация „Карпатска нїжина”, хтора повязує держави од України по Словению.
Бешедуюци о туризму Войводини, заменїк покраїнского секретара за привреду Балинт Югас гварел же Войводина єдна цалосц хтора ма подобни условия туризму як и сушедни держави, алє нєдостаточно вихасновани потенцияли велнес, спа, валалского, етно и наутичного туризму.
– Указало ше же у Войводини найрозвитши конґресни туризем, а за туристох найатрактивнєйши Нови Сад з Фрушку гору и Суботица з околїском. За розвой валалского туризму нє треба буц фаховец, лєм указац туристом ровнїну, єдзенє, вино и музику – гварел Югас.