РУСКИ КЕРЕСТУР – У рамикох Спортских бавискох (СБ) „Яша Баков” всоботу, 25. юния, у Руским Керестуре отримани турнир у одбойки, на хторим ше змагали шейсц екипи – пейц з наших местох и єдна з Перечину, з України, хтора и победзела на турниру.
На основи Спорозуменя о братименю Руского Керестура и Перечину, Керестурци концом мая були госци на Дньох Перечину, а на чолє з городоначалнїком Иваном Погориляком, екипа з побратименого городу у Закарпатскей обласци України була поволана на тогорочни Фестивал култури „Червена ружа”, дзе участвовали на турнире у одбойки.
Спред орґанизаторох, турнир отворели предсидатель Совиту Месней заєднїци Руски Керестур Владимир Олеяр и подпредсидатель СБ „Яша Баков” Янко Хома мл., а потим шицки учашнїки з минуту цихосци дали почесц покойному Юлиянови Рамачови Чамови.
На турнире екипи були подзелєни до двох ґрупох – екипи з А ґрупи – керестурски „Трамонте”, екипа дюрдьовского КУД „Тарас Шевченко” и екипа Перечину бавели у Спортскей гали, док екипи з Б ґрупи – „Русин” з Руского Керестура, та РКЦ Нови Сад и КПД „Карпати” з Вербасу бавели у физкултурней сали Школи „Петро Кузмяк”.
После бависка по ґрупох, за пияте место ше змагали Дюрдьовчанє и Новосадянє, дзе победзела екипа РКЦ з Нового Саду, а за треце место ше змагали керестурски екипи „Русин” и „Трамонте”, а победзел „Трамонте”.
У финалу бавели екипа КПД „Карпати” и госцох з України, котри и победзели и дому однєсли освоєни погар и медалї.