ДЮРДЬОВ – У просторийох дюрдьовскей Месней заєднїци (МЗ) всоботу, 11. юния, подписана догварка о сотруднїцтве Дюрдьова и места Великий Березний з України. Документ подписали предсидателька Совиту МЗ Дюрдьов Леона Виславски и староста места Великий Березний Боґдан Кирлик.
Як за Рутенпрес гварела Леона Виславски, будзе ше сотрудзовац у вецей обласох, за тераз найвецей у култури и спорту, а з часом и у других обласцох, интересантних нє лєм за Дюрдьов, алє Руснацох вообще.
Же тото сотруднїцтво може буц на хасен цалей нашей заєднїци потвердзел и предсидатель Вивершного одбору Национаного совиту Руснацох Желько Ковач, насампредз у образованю, пре приход дзецох з України до нашей Ґимназиї у Руским Керестуре.
З делеґацию представительох українского валалу пришли и хлапци возросту висших класох основней школи, котри всоботу участвовали на турнире у фодбалу на дюрдьовским стадионє ФК „Бачка”.
Госци нащивели и Моников салаш, Єґричку и ґолф терен у Жаблю, Петроварадинску твердиню, вчера фодбал бавели и з членами КУД „Тарас Шевченко”, а нащивели и Фестивал українскей националней меншини у Сербиї „Калина”, хтори отримани у Индїї.