Виношенє шмеца и услуги отримованя желєних поверхносцох у шидскей општини у 2016. року буду висши за 10 одсто у одношеню на прешли рок. Таку одлуку прилапели одборнїки СО Шид прилапююци Програму дїлованя ЯКП „Стандард” за 2016 рок.
Тиж у планє и числени укладаня, а укратко их нащивела Славица Сремац зоз Финансийней служби подприємства. Як визначела, планує ше ушориц нови теметов и городску депонию шмеца, а тиж ше планує вибудов азила за псох блукачох. За виробок проєктней документациї потребне 490 000 динари, а за вибудов ище милион.
– Од укладаньох плануєме злєпшац услугу виношеня шмеца бо купиме нову превозку, а тиж плануєме купиц и превозку за превоженє загинутих животиньох, як и набавку погребней превозки. Плануєме ушориц и желєни пияц, набавиме нови косачки, бо маме вше вецей отримовац желєни поверхносци – наглашує Славица Сремац.
Подпримєство ше будзе намагац цо вецей заробиц на тарґовищу и же би були зменшани субвенциї локалней самоуправи, а цени за пияц, вашар, услуги хованя и паркированя ше нє буду звекшовац. Тераз у „Стандарду” заняти 104 особи, од хторих 95 на нєодредзени час, а дзевец на одредзени час.
Тиж и ЯКП „Водовод” у тим року подрагши цену води за пейц одсто, а надополнєнє за водомери остава нєпременєне. Александар Йованович, директор „Водоводу”, гвари же єст случаї дзе ше наплацованє услуги хаснованя води мушело запровадзиц прейґ суду. У и „Водоводу” планую значни инвестициї, насампредз, першу и другу фазу вибудови нового цивоводу, и за тоту намену вежнє ше кредит. Намаганє же би ше зменшало субвенцию локалней самоуправи, а вона у 2016. рок планована же будзе 12 милиони динари.