Подручна канцелария НС у Коцуре достанє просториї

автор тах
900 Опатрене

КОЦУР – Вчера вечар у Доме култури у Коцуре отримана схадзка Подрученей канцелариї Националного совиту Руснацох (ПК НС) з представителями НС, а пре винаходзенє оптималного ришеня за просториї ПК у Коцуре.

Попри предсидателя ПК Миколу Ґубаша и єй членох, на схадзки присуствовали предсидатель НС Славко Рац, подпредсидатель НС Микола Шанта и предсидатель Вивершного одбору Совиту Желько Ковач.

После викладаня идейох и дискусиї, на схадзки одлучене же ше за потреби ПК канцелариї виєдна просториї у улїци Ошлєбодзеня число 7, обок коло Дому култури.

Потим як буду дефиновани маєтно-правни одношеня з власнїком, а предвидзене же ше з нїм направи контракт за вецейрочне хаснованє, будзе виробени проєкт з предрахунком за адаптованє просторийох.

Як потолковане на вчерайшей схадзки, намира же би ше средства з видаваня квартелю у власнїцтве НС у Новим Садзе, унапрямело за кирию за просториї ПК у Коцуре.

Просториї Подручней канцелариї НС у Коцуре буду на розполаганю шицким, а обчекує ше же то будзе импулс за оживйованє културного живота Руснацох у валалє.

ПОВЯЗАНИ ТЕКСТИ