НОВИ САД – Вчера, 13. юлия, у Новим Садзе почала треца манифестация „Под корунами на Штранду”, а тирва по 16. авґуст.
Тогорочна манифестация ма и преширену назву „Под корунами на Штранду – медиї, уметносц и спорт”, прето же будзе промововац медиї на язикох меншинох, алє и уметносц и спорт.
У першим тижню буду представени спортисти, та ше през програми на Штранду заинтересовани нащивителє годни упознац з олимпизмом, а з познатима особами зоз швета спорту кажди дзень од 19 до 20 годзин будзе бешедовац познати спортски новинар Йован Танурджич.
Язични роботнї за дзеци на мадярским, румунским, словацким и руским язику починаю 20. юлия. На роботнї меншинских язикох можу участвовац дзеци од 5-12 роки, буду починац на 19 годзин, а соботами будзе орґанизовани квиз з преверйованьом наученого.
У рамикох манифестациї „Под корунами на Штранду” будзе и роботня у хторей медийни професионалци буду робиц з дзецми штредньошколского возросту. Тоти роботнї буду орґанизовани кажду нєдзелю на 19 годзин.
Тогорочну манифестацию ше отримує у рамикох Новосадского дзецинского лєта, а орґанизаторе Библиотека Городу Нового Саду – Библиотека на Штранду, Центер за розвой меншинских и локалних медийох и „Герор медия понт”.
